முஸ்லிம்களுக்கு எதிராக அவதூறு பரப்புவர்கள் மீது கடும் நடவடிக்கை எடுக்க வலியுறுத்தல்

புதுச்சேரி கொரோனா விழிப்புணர்வு மற்றும் கண்காணிப்புக் குழு சார்பில் இன்று (03.03.2020) விடுத்துள்ள அறிக்கை:

கொரோனாவால் பாதிக்கப்பட்டவர்கள் குறித்த வதந்திகளுக்கும் அவதூறுகளுக்கும் புதுவை அரசு முற்றுப்புள்ளி வைக்க வேண்டுமென கொரோனா விழிப்புணர்வு மற்றும் கண்காணிப்புக் குழு வேண்டுகோள் விடுத்துள்ளது.

கொரோனா நோய் தொற்று உலகம் முழுவதும் பரவி உலக மக்களை அதிர்ச்சியிலும் அச்சத்திலும் ஆழ்த்தியுள்ளது. இந்தியாவிலும் இதன் பாதிப்புகள் அதிகரித்து வரும் நிலையில் புதுவை அரசும் சுகாதாரத் துறையும் மருத்துவ பணியாளர்களும் கடுமையாக உழைத்து மக்கள் நலப்பணியில் ஈடுபட்டு வருகின்றனர்.

சமகாலத்தில் இதுவரை இல்லாத அளவிற்கு மிகப்பெரும் பாதிப்புகளை ஏற்படுத்தி இந்நோயில் இருந்து பாதுகாப்பு பெற அனைத்து தரப்பு மக்களும் ஒத்துழைத்து வருகின்றனர். இந்நிலையில் கடந்த இரண்டு நாட்களாக பரப்பப்பட்டு வரும் செய்திகள் முஸ்லிம்களை குற்றம்சாட்டும் வகையில் அமைந்துள்ளன.

தலைநகர் டெல்லியில் உள்ள தப்லீக் ஜமாத் தலைமையகத்தில் நடைபெற்ற நிகழ்ச்சியில் கலந்து கொண்டவர்கள் மூலமாகத்தான் இந்நோய் இந்தியாவில் பரவுகிறது என்ற ரீதியில் செய்திகள் பரப்பப்பட்டன. இந்த செய்தி வெளியிட்டதைக் கொரோனா விழிப்புணர்வு மற்றும் கண்காணிப்புக் குழு வன்மையாக கண்டிக்கிறது. டெல்லி நிகழ்ச்சி குறித்தும் அதில் தங்கள் தரப்பில் மேற்கொள்ளப்பட்ட முயற்சிகள் குறித்தும் தப்லீக் தலைமை ஏற்கெனவே விளக்கம் அளித்துள்ளது. மத்திய மற்றும் டெல்லி மாநில அரசுகளின் அலட்சியப் போக்கும், சிந்தித்துச் செயல்படாத தன்மையுமே இவ்விவகாரம் மோசமாகக் கையாளப்பட்டதற்கு காரணமாகும்.

இந்நிலையில் டெல்லி நிகழ்ச்சியில் கலந்து கொண்டவர்கள் தாமாகவே முன்வந்து மருத்துவப் பரிசோதனைச் செய்ய வேண்டும் என்ற அரசின் கோரிக்கையை ஏற்று 7 நபர்கள் மருத்துவப் பரிசோதனைகளுக்கு முன் வந்துள்ள நிலையில் ஏதோ இவர்கள் தலைமறைவாக இருப்பது போன்ற செய்திகள் பகிரப்படுகின்றன.

அத்துடன் பரிசோதனைக்காக சென்றவர்களுக்குப் பரிசோதனை நடத்தப்படவில்லை என்றும் பரிசோதனையின் முடிவுகள் முறையாக அறிவிக்கப்படுவதில்லை என்றும் பரிசோதனைக்குச் சென்றவர்களால் குற்றச்சாட்டுகள் வைக்கப்படுகின்றன.

முறையான தகவல்கள் இல்லாத காரணத்தினால் இவர்களுக்கு உண்மையாகவே கொரோனா சோதனை மேற்கொள்ளப்பட்டதா என்ற சந்தேகமும் மக்களுக்கு எழுகிறது.

எனவே, இச்சந்தேகங்களையும் மக்களின் அச்சத்தையும் போக்கும் வகையில் தமிழக அரசு கொரோனா பாதிக்கப்பட்டவர்கள் மற்றும் குணமடைந்தவர்கள் குறித்த விபரங்களை அதிகாரிகளை கொண்டு வெளியிடுவதை தவிர்த்து அத்துறை சார்ந்த அமைச்சரைக் கொண்டு தினமும் வெளியிட வேண்டும் என்று கொரோனா விழிப்புணர்வு மற்றும் கண்காணிப்புக் குழு கேட்டுக் கொள்கிறது.

அதே போன்று பொறுப்பாக செயல்பட வேண்டிய ஊடகங்களில் சில மிக மோசமாக செய்திகளை வழங்குகின்றன. இந்தப் பொறுப்பற்ற செயலைக் கொரோனா விழிப்புணர்வு மற்றும் கண்காணிப்புக் குழு கண்டிக்கின்றது. இத்தகைய செயலை ஊடகங்கள் கைவிட்டு சமூக பொறுப்போடு செயல்பட வேண்டும்.

தெளிவற்ற தகவல்களை மையமாக வைத்து முஸ்லிம்களுக்கு எதிராகவும் இஸ்லாத்திற்கு எதிராகவும் சமூக வலைதளங்களில அவதூறு செய்திகளை பகிர்பவர்கள் மீது புதுவை அரசு கடும் நடவடிக்கைகளை மேற்கொள்ள வேண்டும் என்றும் கொரோனா விழிப்புணர்வு மற்றும் கண்காணிப்புக் குழு கேட்டுக் கொள்கிறது.

மேலும் அரியாங்குப்பம், திருக்கனூர் போன்ற பகுதிகள் முழுமையாக மூடப்பட்டுள்ளதால் அங்கு வசிக்கும் மக்கள் தங்களது அடிப்படை தேவைகளுக்குப் பால் மற்றும் மளிகை பொருட்கள் வாங்குவதற்கு கூட வெளியில் வர முடியாத சூழலும் உருவாகியிருக்கிறது. இதில் சுல்தான்பேட்டை பகுதியில் தொற்று நோய் அறிகுறி உறுதிப்படுத்தாத நிலையிலும் பொதுமக்கள் வெளியில் செல்லாத அளவிற்கு முடக்கப்பட்டுள்ளது.

இந்த நிலைமையைச் சீர் செய்யுமாறும் அந்த மக்களுக்கு போதிய அத்தியாவசிய பொருட்கள் கிடைக்க வழிவகை செய்யுமாறு புதுவை அரசுக்கு இந்தக் குழு வலியுறுத்திக் கேட்டுக் கொள்கிறது.

இப்படிக்கு,

கொரோனா விழிப்புணர்வு மற்றும் கண்காணிப்புக் குழு, புதுச்சேரி.

புதுவை அப்துல்லாஹ்,
மாநில இணை ஒருங்கிணைப்பாளர்,
SDPI கட்சி,

கோ. சுகுமாரன்,
செயலாளர்,
மக்கள் உரிமைக் கூட்டமைப்பு,

மா. இளங்கோ,
மாநிலத் துணைத் தலைவர்,
தந்தை பெரியார் திராவிடர் கழகம்,

இரா. முருகானந்தம்
தலைவர்,
மனித உரிமைகள் மற்றும் நுகர்வோர் பாதுகாப்பு இயக்கம்,

சீ.சு. சுவாமிநாதன்,
நிறுவனர்,
புதுச்சேரி யூனியன் பிரதேச மாணவர் கூட்டமைப்பு,

கோ. அழகர்,
மாநிலச் செயலாளர்,
தமிழர் களம்.

A. ரபீக் மன்சூர்,
பகுதிச் செயலாளர்
பாப்புலர் ஃப்ரண்ட் ஆஃப் இந்தியா.

Be the first to comment

Leave a Reply

Your email address will not be published.


*


This site uses Akismet to reduce spam. Learn how your comment data is processed.