பாகூர் சட்டமன்ற உறுப்பினர் தனவேலு பதவிப் பறிப்பு: சமூக, ஜனநாயக இயக்கங்கள் கண்டனம்!

சமூக, ஜனநாயக இயக்கங்கள் சார்பில் இன்று (12.07.2020) விடுத்துள்ள கூட்டறிக்கை:-

தொகுதி மக்களின் பிரச்சனைகளுக்காகவும், ஊழலுக்கு எதிராகவும் போராடிய பாகூர் சட்டமன்ற உறுப்பினர் தனவேல் பதவிப் பறிப்புச் சட்டத்திற்குப் புறம்பான செயல் என்பதால் சமூக, ஜனநாயக இயக்கங்கள் சார்பில் வன்மையாகக் கண்டிக்கிறோம்.

பாகூர் சட்டமன்ற உறுப்பினர் தனவேல் பாகூர் ஆரம்ப சுகாதார நிலையத்தைத் தரம் உயர்த்தவும், மருந்துகள், ஆம்புலன்ஸ் வசதிகள் செய்து தரவும், அமைச்சர்களின் ஊழல் குறித்து துணைநிலை ஆளுநரிடம் புகார் அளித்து நடவடிக்கை எடுக்கவும் கோரி போராட்டம் நடத்தினார்.

இதனால், அவர் மீது காழ்ப்புணர்வுக் கொண்ட முதல்வர் நாராயணசாமி அவரை கட்சித் தாவல் தடைச் சட்டத்தின் கீழ் பதவி நீக்கம் செய்ய சட்டப்பேரவைத் தலைவர் மூலம் நடவடிக்கை எடுத்துள்ளார்.

காங்கிரஸ் கட்சியை விட்டு விலகாமல் தொகுதி மக்களின் நலனுக்காகப் போராடியதற்காகக் கட்சித் தாவல் தடை சட்டத்தின்படி நடவடிக்கை எடுக்க முடியாது. இந்த அடிப்படை சட்டப் புரிதல்கூட இல்லாமல் பழிவாங்கும் நோக்கில் எடுக்கப்பட்ட நடவடிக்கை சட்டத்திற்குப் புறம்பானது.

சென்னை உயர்நீதிமன்றம் தகுதி நீக்கம் செய்வதற்கு முன் தனவேலுவிடம் விசாரிக்க வேண்டும் என்று கூறியதை அப்பட்டமாக மீறியுள்ளனர். மேலும், விசாரணைக்குப் போதிய கால அவகாசம் கேட்டும் அளிக்காமல் நடவடிக்கை எடுத்தது இயற்கை நீதிக்கு எதிரானது.

அரசுக்கு எதிராக ஆளும் கட்சி சட்டமன்ற உறுப்பினர்கள் லட்சுமி நாராயணன், ஜான்குமார், பாலன், தீப்பாஞ்சான் உட்பட பலர் குரல் எழுப்பியும், போராட்டம் நடத்தியும் வருகின்றனர். இவர்கள் மீது நடவடிக்கை எடுக்காமல் தனவேலு மீது மட்டும் நடவடிக்கை எடுத்தது உள்நோக்கம் கொண்ட செயலாகும்.

தேர்தல் வாக்குறுதி எதையும் நிறைவேற்றாததால் ஆளும் அரசு மீது மக்கள் கடும் அதிருப்தியில் உள்ளனர். இதனைத் திசைத் திருப்பவே பதவிப் பறிப்பு நடவடிக்கை எடுக்கப்பட்டுள்ளது. அமைச்சர்கள் மீது ஊழல் பட்டியல் அளித்தது பற்றி எவ்வித நடவடிக்கையும் எடுக்காமல் புகார் அளித்தவர் மீதே நடவடிக்கை எடுத்தது ஏற்க முடியாது.

கொரோனா காலத்தில் மக்களுக்கு அரசு பெரிய அளவில் உதவிகள் எதுவும் செய்ய முடியாத போது, சட்டமன்ற உறுப்பினர்களே தங்கள் சொந்தச் செலவில் அரிசி, பருப்பு உள்ளிட்ட பொருட்கள் வழங்கி மக்களைப் பாதுகாத்து வருகின்றனர். இந்நிலையில், இப்பதவிப் பறிப்பு மிகவும் பின்தங்கிய பகுதியான பாகூர் தொகுதி மக்களை வஞ்சிப்பதோடு, வாக்களித்த அம்மக்களின் உரிமைகளை நசுக்கும் செயலாகும்.

எனவே, சட்டத்திற்குப் புறம்பான இப்பதவி பறிப்பைத் திரும்பப் பெற சட்டப்பேரவைத் தலைவர் சிவக்கொழுந்து உடனே நடவடிக்கை எடுக்க வேண்டுமென சமூக, ஜனநாயக இயக்கங்கள் சார்பில் வலியுறுத்துகிறோம்.

இவண்,

கோ.அ.ஜெகன்நாதன், செயலாளர், மக்கள் வாழ்வுரிமை இயக்கம்.

லோகு.அய்யப்பன், தலைவர், திராவிடர் விடுதலைக் கழகம்.

இரா. மங்கையர்செல்வன், அமைப்பாளர், மீனவர் விடுதலை வேங்கைகள்.

கோ.சுகுமாரன், செயலாளர், மக்கள் உரிமைக் கூட்டமைப்பு.

கோ.அழகர், செயலாளர், தமிழர் களம்.

சி. ஸ்ரீதர், அமைப்பாளர், தமிழக வாழ்வுரிமைக் கட்சி.

இர.அபிமன்னன், தலைவர், இராவணன் பகுத்தறிவு இயக்கம்.

கு.இராம்மூர்த்தி, தலைவர், செம்படுகை நன்னீரகம்.

பெ.பராங்குசம், தலைவர், இலக்கிய பொழில் இலக்கிய மன்றம்.

தூ. சடகோபன், தலைவர், புதுச்சேரி தன்னுரிமைக் கழகம்.

பெ.இரகுபதி, புதுச்சேரி பூர்வகுடி மக்கள் பாதுகாப்பு இயக்கம்.

ஆ.பாவாடைராயன், தலைவர், புரட்சியாளர் அன்பேத்கர் தொண்டர் படை.

Be the first to comment

Leave a Reply

Your email address will not be published.


*


This site uses Akismet to reduce spam. Learn how your comment data is processed.