சாத்தான்குளம் காவல் நிலையப் படுகொலை : காவல்துறையினர் மீது கொலை வழக்குப் பதிந்து கைது செய்ய வேண்டும்!

மக்கள் உரிமைக் கூட்டமைப்பு செயலாளர் கோ.சுகுமாரன் இன்று (01.07.2020) விடுத்துள்ள அறிக்கை:

தூத்துக்குடி மாவட்டம் சாத்தான்குளம் காவல்நிலையத்தில் தந்தை, மகன் அடித்துக் கொல்லப்பட்ட சம்பவத்தில் தொடர்புடைய காவல்துறையினர் அனைவர் மீதும் கொலை வழக்குப் பதிவு செய்து உடனே கைது செய்ய வேண்டுமென ‘மக்கள் உரிமைக் கூட்டமைப்பு’ சார்பில் தமிழக அரசை வலியுறுத்துகிறோம்.

சாத்தான்குளத்தில் செல்போன் கடை வைத்திருந்த ஜெயராஜ், அவரது மகன் பென்னிக்ஸ் ஆகியோரை காவல்நிலையத்தில் கடும் சித்திரவதைக்கு உள்ளாக்கியதால் தான் இறந்துள்ளனர் என்பது உடற்கூறாய்வு அறிக்கை, நீதித்துறை நடுவர் விசாரணையில் உறுதியாகி உள்ளது.

இதுகுறித்து தாமாக முன்வந்து வழக்குப் பதிவு செய்து விசாரித்து வரும் உயர்நீதிமன்ற மதுரைக் கிளை நீதிபதிகள் பி. என். பிரகாஷ், பி. புகழேந்தி ஆகியோர் ‘கொலை வழக்குப் பதிவு செய்ய போதிய முகாந்திரம் உள்ளது எனக்கூறி காவல்துறையினர் மீது கொலை வழக்குப் பதிவு செய்ய வேண்டும்’ என உத்தரவிட்டுள்ளனர்.

மேலும், இவ்வழக்கை நெல்லை சரகச் சி.பி.சி.ஐ.டி. துணைக் காவல் கண்காணிப்பாளர் அனில் குமார் தலைமையிலான சிறப்புப் புலனாய்வுக் குழு விசாரிக்கவும் உத்தரவிட்டுள்ளனர். இதனைத் தொடர்ந்து துணைக் காவல் கண்காணிப்பாளர் அனில் குமார் தலைமையில் 4 காவல் ஆய்வாளர்கள் உள்ளடக்கிய 30 பேர் கொண்ட சிறப்புப் புலனாய்வுக் குழு அமைக்கப்பட்டு விசாரணை நடைபெற்று வருகிறது.

இதனால், உயர்நீதிமன்ற நீதிபதிகள் உத்தரவில் கூறியது போல இவ்வழக்கில் சி.பி.ஐ. விசாரணைக்குத் தேவை இருக்காது எனக் கருதுகிறோம். ஆகையால், உயர்நீதிமன்ற கண்காணிப்பில் சி.பி.சி.ஐ.டி. புலன் விசாரணையே போதுமானது.

உயர்நீதிமன்ற நீதிபதிகள் உத்தரவைப் பின்பற்றி இச்சம்பவத்தில் தொடர்புடைய காவல்துறையினர் அனைவர் மீதும் கொலை வழக்குப் பதிவு செய்து உடனே கைது செய்ய வேண்டும்.

கொலையான இருவரையும் ரிமாண்ட் செய்யும் போது சட்டப்படி செயல்படாமல் கடமையில் இருந்து தவறிய சாத்தான்குளம் நீதித்துறை நடுவர், முதன் முதலில் பரிசோதித்து மருத்துவ அறிக்கை அளித்த மருத்துவர், கோவில்பட்டி சிறைத்துறை அதிகாரிகள் என அனைவர் மீதும் நடவடிக்கை எடுக்க வேண்டும்.

இவ்வழக்கில் சாட்சியம் அளித்த சாத்தான்குளம் காவல்நிலையப் பெண் காவலர் ரேவதி உள்ளிட்ட சாட்சிகளுக்குப் போதிய பாதுகாப்பும், சாட்சியம் அளிக்க அச்சுறுத்தல் இல்லாத சூழலை உருவாக்கவும் நடவடிக்கை எடுக்க வேண்டும்.

இதுகுறித்து தமிழக முதலமைச்சர், உள்துறைச் செயலர், காவல்துறைத் தலைமை இயக்குநர் (DGP) ஆகியோருக்கு மனு அனுப்பி உள்ளோம்.

Be the first to comment

Leave a Reply

Your email address will not be published.


*


This site uses Akismet to reduce spam. Learn how your comment data is processed.